Nu Ngipi Dadi Presidén

Dados istri orang nomer satu, ring désa yadiastu sarahina kiterin istri-istri sajebag Désa Nusantari pangarania kastu. Kija kémawon masesambang, napi kémanten kadabdabang, ring dija ugi manglalang, setata kayahin ibu-ibu tan kapialang. Asing-asing kabaosang setata katinutin, ten wénten ngapang-apang purun manungkasin. 

Ring goba, ring pangadeg, ring pajalan, ring mareraosan, bilih-bilih ring pendidikan, Mén Kawi doooh… sor kasorang ring ibu-ibu PKK tiosan, sarjana, pengacara, guru teladan, tokoh masyarakat. Sangkaning somah ngicénin angin, mawinan ipun rumasa di atas angin. Mangkin Pan Kawi ten sanggup malih ngicénin angin, mawinan Mén Kawi kécalan angin, pamuput mati angin. Riin salami dasa tiban, ipun sakadi tan ngenjek tanah, mangkin mawali ka tanah. Riin akéh ngemban ring sédan, mangkin mawali ka slépan majejaitan. Bengong I Kawi ring tingkah méménnyané bawak matilesan awak, nanging bingung ring solah bapannyané mrekak ten éling ring awak.

“Bapa kija Mé?”

“Awié? Kija kadén lakuna. Suba orahin ngoyong jumah, nu dogén cara pejabat kenehné, patangtang paténgténg kema mai.”

“Bapa post power syndrome. Jabatan bukan hadiah, tetapi amanah. Orahin Bapa, Mé!”

“Kanti kelés cadiké ngorahin. Percuma, masuk telinga kiri keluar telinga kiri.”

“Benya naké ngorahin masé.”

“Suba orahin beneh-beneh, malah Cang dengkika. Cang kanti lek ajak timpal-timpalé, dini-ditu anaké némérang Bapa. Depinin Cang terasné, kénkén ya panadiné.”

Jakti, Pan Kawi setata dados tanggun satua ring pasangkepan, ring pajongkokan, ring patuakan, ring pabongbongan, riang pakayehan, ring warung, ring penggak, ring peken, ring balé banjar. Ring dija jua krama bramban-brumbun magubugan, wantah Pan Kawi dados entél-entélan. Duk tambis wusan menjabat perbekel période kedua, malah dados kakedékan gumi. Bas dotnyané dados pejabat, jeg wénten bayuné ngusulang mangda kadadosang menjabat perbekel tiga période. Undang-undang netepang paling sué kalih périodé, Pan Kawi nagih nglanggang undang-undang mangda kadadosang tiga période. Sanusantari krama patigrenggeng. Gedé Hasta paling gedeg ngeton bikas laad timpalnyané raket kadi engkat.

“Lengeh céléngé. Dija poloné Pan Kawi maan nuduk aturan kéto.”

“To kan nak mara usul, Hasta.”

“Yadian usul, tetapi pang masuk akal ké usulé.”

“Adané dogén anak bingung paling.”

“Bingung dadi, paling dadi, kéwala da ka masyarakat ngédéngang bingung nyinahang paling! Depang jumah dogén édéngang lengehé.”

“Mula kéto jenenga pejabat-pejabat jani.”

“Kénkén to?”

“Suba kadung barak sing makita marun.”

“Artiné?”

“Suba kadung negak sing makita tuun.”

“Ha…ha…ha…”

I Kawi sané wénten ring pagubungan punika sakadi tan ngelah mua, pramangkin ipun nglingkung tan papamit. Jengah manah ipuné sarahina-rahina dibully kanggén bé semengan olih timpal-timpalnyané. Aget wénten I Bawa,  timpalnyané asiki sané leket susatia matimpal suka lan duka sareng I Kawi.

“Kawi.”

“Éngkén?”

“Orahin ja beneh-beneh Bapan awaké apang suud ngindeng cara nu pejabat takehné!”

“Kanti madidih-didih bunguté ngorahin sing dingeha bebedag adag.”

“Pepesan ngorahin! Sing mempan pang pindo, ping telunin. Sing mempan ping telu, ping patin!”

“Méh lebihan suba kin ping satus orahin Cang, malah Cang dengkika.”

“Béh yan saja kéto, suba parah né.”

Parah yukti sampun sakit Pan Kawi. Yén andéang kanker, sampun stadium empat. Ten mrasidayang nambanin malih, nyantosang mati kémanten. Santukan ten wénten ngembangang sarahina-rahina kasimbingin ring margi-margi ngawé manah krama jengah. Gdé Hasta paling grimutan basangné, tan trima wénten jadma mrekak cawé-cawé ring désa pakraman, yadiastu kapernah timpal kelihan.

“Beli”

“Éngkén Hasta? Tumbén benya iseng teka, inget ajak timpal.”

“O, Beli nu nganggep Cang timpal?”

“Selama benya nu nganggep Beli timpal, Beli masé nu nganggep benya timpal.”

“Yan suba kéto, apang sing kanti nak lén nuturin, Cang jani ngingetin Beli.”

“Kadén benya Beli sing inget, buin ingetin benya?”

“Karena nu not Cang Beli sigug.”

“Sigug?”

“Tekén tuan Beliné Cang sing bani. Tekén sigug Beliné Cang bani.”

“Sigug kénkén orahang benya, Beli?”

“Cawé-cawé. Suud amonto cawé-cawé! Ngelek-elekang ati dogénan. Tidong-tidong tua.”

“Sing baang cawé-cawé, ngudiang Beli orahin benya?”

“Toko mébelé buin buka idupang!”

“Béh benya né keterlaluan sekali. Masak mantan presidén orahin benya dagang mébel.”

“Presidén?”

“Presidén.”

“Presidén dari Hongkong?”

“Presidén désa mantan. Presidén rumah tangga jani.”

“Bantas koné laad dadi presidén di désa dogén, membuat Beli punyah, mabuk kekuasaan.”

“Jani tetep presidén. Presidén rumah tangga.”

“Bantas dadi presidén désa, presidén rumah tangga dogén aéng ajumné. Apabuin Beli maan dadi presidén RI, kénkén ya bonggan Beliné.” 

“Mogi-mogi Ratu Betara, madak saja tiang bisa dados Presidén RI. Yan jakti titiang bisa dados Presidén RI, pianak mantu makejang kal anggon gubernur, bupati, walikota.”

“Ya ampun,ya Tuhan, biin nyanget-nyangetang punyah Beliné.” 

“Makanya da orahina Beli dadi dagang mébel, dadi kakedékan gumi.”

“Loh. Malah Beli dihormati, biar laad dadi pejabat, yén suba suud dadi pejabat, gaé apa dogén dadi jemak, dadi rakyat biasa. Pénsiunan jénderal ada dadi petani. Beli pénsiunan presidén désa, ambeké cara nu dadi pejabat tinggi.”

“Mantan Beli.”

“Mantan, maan taén, laad-laad perbekel, sing ada masisa nu, jani Beli rakyat biasa. Solahé eda nu cara pejabat. Tusing ja krama dogén kedék, teked katak dongkang di pangkung-pangkungé milu ngedékin Beli. Laad pejabat, Beli harus berdiri di tengah-tengah, sing dadi memihak. Sing Beli marasa dadi cicing borosan, anggona alat oléh pihak-pihak tertentu? Né terakhir Cang nuturin Beli. Tekén tuan Beliné Cang tusing bani, tekén sigug Beliné Cang bani. Biar mamusuh ajak Beli lawan Cang, yan nu sigug Beliné cara kéné.”

“?????”

“Beli né nu ngipi mara bangun semengan tawang? Ada dua pilihan hidup ketika bangun pagi. Kembali tidur untuk melanjutlan mimpi, atau langsung bangun untuk mewujudkan mimpi. Beliné ngipi, nu inget-ingetan dot dadi presidén.”

Mén Kawi seneng miragiang Hasta habis-habisan nuturin kumantos Pan Kawi ten ngelah pasaut. Mén Kawi ten percaya somahnyané bisa berubah. Lengar sampun nglinggah-linggahang, jantuk ngonjol-ngonjolang, gidat matampih-tampihan, jrijin lima ngléngkong-ngléngkongang, nu masé inget-ingetan dadi presidén. Mén Kawi tengkejut, somahnyané pasemengan pisan sampun nyrekis.

“Beli lakar kija né semengan sajan?”

“Kampanye.”

“Lengeh céléngé. Pan Kawi mula jlema tidak mau berubah.” 7